МОЛИТВА КО СВЯТОМУ ВЕЛИКОМУЧЕНИКУ МИНЕ

О святый великомучениче Христов, Мино многострадальне, образ благочестиваго жития на земли верным явивший, мученическою же кончиною твердость веры своея засвидетельствовавший и венец нетленныя славы от руки Венцедавца Христа восприявший на Небесех! Молися о иже с верою притекающих ко святому имени твоему, блаженне, и предстательствуй выну о всех любовию чтущих честную память твою, от многоразличных бед и напастей нас сохраняюще, да ходатайством твоим от сетей лукаваго и от злых людей соблюдаеми в мире и благочестии оставльшияся дни жития нашего поживем, хваляще дивнаго во Святых Бога. О, страстотерпче святый мучениче Мино! Взирающе на икону твою и поминающе цельбы, тобою подаваемые всем, с верою и благоговеинством к тебе притекающим, припадаем ти и, приклонше колена сердец наших, от всея души нашея молим тя: буди нам ходатай пред Господем и Спасом нашим Иисусом Христом о немощех наших, сопутствуй и утешай нас во время скорбей наших, даруя нам память о гресех наших, помогай в напастех и треволнениях мира сего, и во всех бедах, в сей юдоли плачевней нас постигающих. Аминь.

МОЛИТВА КО ПРЕСВЯТОЙ БОГОРОДИЦЕ

О Пресвятая Госпоже Владычице Богородице, вышши еси всех ангел и архангел и всея твари честнейши, помощнице еси обидимых, ненадеющихся надеяние, убогих заступнице, печальных утешение, алчущих кормительнице, нагих одеяние, больных исцеление, грешных спасение, христиан всех поможение и заступление. О всемилостивая Госпоже, Дево Богородице Владычице! Милостию Твоею спаси и помилуй святейшия патриархи православныя, преосвященныя митрополиты, архиепископы и епископы и весь священнический и иноческий чин, и вся православныя Христианы ризою Твоею честною защити; и умоли, Госпоже, из Тебе без семене воплотившагося Христа Бога нашего, да препояшет нас силою Своею свыше на невидимыя и видимыя враги наша. О всемилостивая Госпоже Владычице Богородице! Воздвигни нас из глубины греховныя и избави нас от глада, губительства, от труса и потопа, от огня и меча, от нахождения иноплеменных и междоусобныя брани, и от напрасныя смерти, и от нападения вражия, и от тлетворных ветр, и от смертоносныя язвы, и от всякаго зла. Подаждь, Госпоже, мир и здравие рабом Твоим, всем православным христианом, и просвети им ум и очи сердечныя, еже ко спасению; и сподоби ны, грешныя рабы Твоя, Царствия Сына Твоего, Христа Бога нашего, яко держава Его благословена и препрославлена, со Безначальным Его Отцем и с Пресвятым, и Благим, и Животворящим Его Духом ныне и присно и во веки веков. Аминь.